இரண்டாம் நாளில் தைப்பூச நடவடிக்கைகள் அதிகாலையிலேயே தொடங்கிவிடும். முதல் நாள் நள்ளிரவுக்குப் பின் வழிபாடுகள் நடத்தப்பட்டு, முதல் தொகுதிப் பக்தர்கள் ஸ்ரீ ஸ்ரீநிவாசப் பெருமாள் கோவிலிலிருந்து தங்கள் பால் குடங்களுடன் அருள்மிகு தெண்டாயுதபாணி ஆலயத்துக்குப் புறப்பட்டுச் செல்வார்கள். காவடி ஏந்தும் பக்தர்கள் விரைவில் தங்கள் காவடிகளுடன் அவ்வாலயத்தை விட்டுப் புறப்படுவார்கள். இப்படியாக அன்று இரவு 7.00 மணிவரை ஸ்ரீ பெருமாள் கோவிலிலிருந்து காவடிப் பிரார்த்தனை உட்பட இதரப் பிரார்த்தனைகளை நிறைவேற்றப் பக்தர்கள் ஸ்ரீ தெண்டாயுதபாணி ஆலயத்தை நோக்கிப் பாத ஊர்வலமாகச் செல்வார்கள்.

 
ஸ்ரீ தெண்டாயுதபாணி ஆலயத்தைப் பக்தர்கள் வந்தடைந்ததும் தங்கள் பிரார்த்தனைப் பால்குடங்களைச் சன்னதியில் சமர்ப்பிப்பார்கள். அதிலுள்ள பால், வேலுக்கு ஊற்றப்படும். வேல்தான் இங்கு மூலவர். இவர்க்குப் பாலாபிஷேக வழிபாடு நீண்ட நேரம் நடக்கும். பிரார்த்தனைகளை முடித்த பக்தர்களுக்கு விபூதிப் பிரசாதம் கொடுக்கப்படும்.

 

இவ்வாறு ஆண்டுதோறும் நாதஸ்வரம், மேள தாள இசையுடன் உறுமி மேளமும் காவடிச் சிந்தும் வழியெங்கும் இசைக்கத் தைப்பூசத் திருவிழா பக்திப் பரவசத்துடன் சிங்கப்பூரில் இனிதே நடைபெறும். சிங்கப்பூரில் பல்லின, சமய சமூகங்களுக்கிடையே புரிந்துணர்வையும் நம்பிக்கையையும் வளர்க்கும் விழாவாகவும் இது அமைகிறது.

 

மலேசியாவில் தைப்பூச விழா

​

மலேசியாவில் பத்துமலை முருகன் கோவில் தமிழர்களிடையே புகழ்பெற்ற ஆலயமாகும். இந்தியாவுக்கு வெளியே அமைந்துள்ள முருகன் ஆலயங்களில் மிக முக்கியமானதாகும். மலையையொட்டிச் சுங்கைப் பத்து ஆறு ஓடுகிறது. பத்துமலைக் கோவில் தைப்பூச விழா உலகப் புகழ் பெற்றது. சிங்கப்பூர், ஆஸ்திரேலியாவிலிருந்து லட்சக்கணக்கான பக்தர்கள் மலேசியா, பத்துமலையில் குவிவார்கள். தைப்பூச நன்னாளில் பக்தர்கள் கோலாலம்பூர் மாரியம்மன் கோவிலிலிருந்து பத்துமலைக்கு அதிகாலையில் தொடங்கி ஊர்வலமாக நடந்து வருவார்கள். நேர்த்திக்கடன் செலுத்த, சிலர் காவடி எடுத்து வருவார்கள். அலகு குத்தியும் நேர்த்திக்கடன் செலுத்துவோரும் உண்டு. சுங்கைப் பத்து ஆற்றில் நீராடிவிட்டு, மலைக்கோவிலுக்கு 272 படிகள் ஏறி வருவது நம்பிக்கை.

 

மலேசியாவின் பினாங்கு மாநிலத்தில் உள்ள ஜோர்ஜ் டவுன் மாநகர அருகில் உள்ள தண்ணீர்மலைக் கோவிலில் பினாங்குத் தைப்பூசம் மிக விமரிசையாகக் கொண்டாடப்படுகிறது. தமிழர்கள் மட்டுமின்றி, சீனர்களும் தைப்பூசத்தை மிக விமரிசையாகக் கொண்டாடுகிறார்கள். இத்தைப்பூசத் திருநாள் மூன்றுநாள் நடைபெறும். தைப்பூசத் திருநாளைப் பினாங்கு மாநில அரசு பொது விடுமுறையாக அறிவித்துள்ளது.

 

மலேசியாவில் ஈப்போ அருகில் குனோங் சீரோ என்னுமிடத்தில் அமைந்துள்ள ஸ்ரீ சுப்பிரமணியன் கோவிலிலும் தைப்பூசம் மிக விமரிசையாகக் கொண்டாடப்பட்டு வருகிறது.

 

மொரீஷியசில் தைப்பூசம்

​

சுப்பிரமணியர்க்கு மொரீஷியசில் தைப்பூசத் திருவிழா எடுக்கிறார்கள். காவடி எடுப்பது ஒரு வழக்கமான நிகழ்வு. அலகு குத்துதல் போன்ற நேர்த்திக்கடன்களும் இங்கும் உண்டு.

​

ஆஸ்திரேலியாவில் தைப்பூசம்

​

ஆஸ்திரேலியாவில் உள்ள சிவா விஷ்ணுக் கோவிலில் இந்துக் கழகத்தின் சார்பில் தைப்பூச விழா நடைபெறுவது உண்டு. சுப்பிரமணியர்க்கு அபிஷேகம், தேரோட்டம் எல்லாம் தைப்பூசத்தன்று நடைபெறும் முக்கிய நிகழ்வுகள். பக்தர்கள் பால்குடம் எடுத்தும் தங்கள் வேண்டுதலைச் செலுத்துகிறார்கள். 

 

தீமிதித் திருவிழா (இது ஐப்பசி மாதத்தில் கொண்டாடப்படும்)

​

தீமிதித் திருவிழா தென்னிந்தியாவில் தோன்றியது. இத்திருவிழாவிற்கும் மகாபாரதக் கதைக்கும் தொடர்பிருப்பதாகக் கருதப்படுகிறது. மகாபாரதக் கதையின் திரெளபதி மாரியம்மனின் அவதாரமாகக் கருதப்படுகிறார். கௌரவர்களுக்கும் பஞ்சபாண்டவர்களுக்கும் இடையே நடைபெற்ற போரில் பஞ்சபாண்டவர்கள் வெற்றியடைந்ததை முன்னிட்டு இவ்விழா கொண்டாடப்படுகிறது. தீமிதித் திருவிழாவிற்கு முன்பாக மகாபாரதக் கதை கூறப்படும். சில இடங்களில் நாடகமாக நடிக்கப்படும். தீமிதியைப் பூக்குழி இறங்குதல் என்றும் குறிப்பிடுவார்கள். இந்தியாவில் மட்டுமல்லாது சிங்கப்பூர், மலேசியா, தென்னாப்பிரிக்கா ஆகிய நாடுகளில் தென்னிந்தியர்கள் அதிகமாக வசிக்கும் இடங்களில் தீமிதித் திருவிழா கொண்டாடப்படுகிறது.

        

சிங்கையில் நார்த் பிரிட்ஜ் சாலையில் அமைந்துள்ள ஸ்ரீ மாரியம்மன் ஆலயத்தில் ஒவ்வோர் ஆண்டும் தீமிதித் திருவிழா சிறப்பாகக் கொண்டாடப்படுகிறது. இங்குத் தீமிதிக்குரிய சடங்குகள் இரண்டு மாதங்களுக்கு முன்பிருந்தே தொடங்கப்படுகிறது. இத்திருவிழா தொடங்குவதற்கு அறிகுறியாகக் கொடியேற்றம் நடைபெறும். அதன் பின்னர்ப் பக்தர்கள் ஒரு மண்டலம் விரதம் அனுசரிப்பார்கள். இத்திருவிழா, தீபாவளிக்கு ஒரு வாரத்திற்கு முன்பு கொண்டாடப்படுகிறது. இத்திருவிழாவிற்கு ஒரு வாரத்திற்கு முன்பிருந்தே ஆண்கள் அங்கப்பிரதட்சணமும் (கோவிலுக்குச் செல்பவர்கள் இடமிருந்து வலப்பக்கமாக மூன்று முறையாவது தெய்வச்சிலை உள்ள கருவறையைச் சுற்றி நடப்பதற்குப் பதிலாகப் படுத்து உருண்டுகொண்டு சுற்றுவது) பெண்கள் கும்பிடுதண்டமும் (பெண்கள் குளித்துவிட்டு ஈரச் சேலையோடு தண்ணீர் சொட்டச் சொட்ட, கோவிலின் வெளிப்பிரகாரத்தில் மண்ணில் குனிந்து, இரண்டு கைகளையும் அகல விரித்து, மண்ணைக்குவிப்பதுபோலத் தரை தடவி, தலைக்கு மேல் கொண்டு சென்று, மண்ணை அள்ளியபடி எழுந்து, முன்னே அம்மண்ணை இறைத்து விட்டு, மண்ணை அள்ளிய இடத்திற்குச் சென்று, அந்த இடத்தில் நின்றபடி மீண்டும் குனிவார்கள். இப்படிப் பிரகாரத்தை மூன்று வளையம் சுற்றி வருவது) செய்வார்கள்[2]. சிலர் பால் குடம் எடுத்து அம்மனுக்குப் பால்காணிக்கை செலுத்துவார்கள். தீமிதிக்கு இரண்டு நாட்ளுக்கு முன்பு வெள்ளி ரதம் தெலுக் பிளங்கா, புக்கிட் மேரா சாலைகளில் ஊர்வலமாக வரும். தீமிதியன்று பக்தர்கள் ஏறத்தாழ காலை நான்கு மணியளவில் தீயில் இறங்குவார்கள். இவ்வாறு சிங்கையில் தீமிதி விழா கொண்டாடப்படுகிறது.

 

மானுட வாழ்வில் மனிதர்கள் அனுபவிக்கும் துன்பங்கள் படுகுழியில் இடப்படும் நெருப்புக்கனல் மிகுந்த கரித்துண்டுகளோடு ஒப்பிடப்படுகிறது. தீக்குழியைத் தாண்டிவந்து நேர்த்திக் கடனை நிறைவேற்றுவது, துன்பங்களைக் கடந்துவந்து வாழ்வில் நாம் கொண்டுள்ள இலக்கை அடைவதைக் குறிப்பிடுகிறது.  

 

நவராத்திரி விழா (இது புரட்டாசி மாதத்தில் கொண்டாடப்படும்)                             

                      

ஸ்ரீ பராசக்தி சண்டிகா தேவிகாளி உக்கிரத்துடன் அவதரித்து மகிசாசுரனுடன் போர்புரிந்து அவனை வீழ்த்தினாள். இவ்வாறு சண்டிகா தேவி மகிஷாசுரமர்த்தினியாக அவதரித்து அசுரனை அழித்த விழாவே நவராத்திரி விழா. நவராத்திரி, உத்தரபிரதேசத்தில் "ராம்லீலா' என்னும் பெயரிலும், வங்காளிகள் "காளிவழிபாடு', "துர்க்கா வழிபாடு' என்றும் கர்நாடகத்தில் "தசரா வழிபாடு' என்றும் கொண்டாடுகின்றனர். தில்லியில் விஜயதசமி அன்று ராவணன் பொம்மைகளை எரித்து ராவணன் சம்காரமாகக் கொண்டாடுகின்றனர்.

 

நவராத்திரி நாட்களில் அம்பிகையை வெவ்வேறு வடிவங்களில் அலங்கரித்து வழிபடுவார்கள். அம்பிகையை முதல் மூன்று நாட்கள் துர்க்கையாகவும் அடுத்த மூன்று நாட்கள் லட்சுமியாகவும் கடைசி மூன்று நாட்கள் சரஸ்வதியாகவும் முப்பெரும் சக்தியரை வழிபடுவார்கள். நவராத்திரியின் முதல்நாள் தேவியான மகேஸ்வரி பாலா, மது கைடபர் அழிவுக்குக் காரணமான தேவி. இரண்டாம் நாள் வழிபடப்படும் கவுமாரி, குமாரியாகப் போற்றப்படுகிறாள். அவளே ராஜ ராஜேஸ்வரியாகவும் ஆராதிக்கப்படுகிறாள். மூன்றாவது நாளுக்கு உரியவாராகி, கன்யா கல்யாணி என்று அழைக்கப்படுகிறாள். நான்காம் நாளில் அருள்பவள், மகாலட்சுமி. இவள் ரோகிணி என்று அழைக்கப்படுகிறாள். ஐந்தாம் நாள் வைஷ்ணவியாகவும் மோகினியாகவும் அலங்கரிப்பார்கள். ஆறாவது நாளுக்குரிய தேவி வடிவம். இந்திராணி. அன்று சர்ப ராஜ ஆசனத்தில் தேவி அமர்ந்திருக்கும் கோலத்தில் வழிபாடு செய்வது வழக்கம். ஏழாம் நாள், தேவி மகாசரஸ்வதி, சுமங்கலி என அழைக்கப்படுகிறாள். எட்டாவது நாள் தேவியானவள் நரசிம்மிதருமி. நரசிம்மி வடிவின் சினம் தணிந்த கோலம் இது. ஒன்பதாம் நாள் அம்பிகை, சாமுண்டி மாதா, அம்பு, அங்குசம் தரித்த லலிதா பரமேஸ்வரியாக அன்னையை வழிபடுவது வழக்கம். பத்தாம் நாள் அசுரர்களை அழித்து அம்பிகை பெற்ற வெற்றியைக் குறிக்கும் விஜயதசமி. அன்று அன்னை வெற்றித் திருமகளாக அலங்கரிக்கப்பட்டு ஆராதிக்கப்படுகிறாள். இந்த வடிவங்களில் தேவியைத் தரிசித்து வழிபடுவதால் நவநிதிகளும் பெற்று, நீடுழி வாழ்வர் என்பது நம்பிக்கை.

நவராத்திரி வழிபாட்டினைத் தெய்வங்களும் தேவர்களும்கூடச் செய்து பலன் பெற்றுள்ளனர். நாரதர் அறிவுரைக்கேற்ப ராமர் கடைப்பிடித்து ராவணனை அழித்துச் சீதையை மீட்டு வந்தார். கண்ணபிரான், சியமந்தக மணி காரணமாக அடைந்த அபவாதம் இவ்வழிபாடு செய்ததால் நீங்கியது. பஞ்சபாண்டவர்கள் பாரதப் போரில் வென்றதும் இந்த வழிபாடு செய்ததால்தான். நவராத்திரியில் ஒன்பது நாட்களும் வழிபாடு விரதம் அனுஷ்டிக்க வேண்டும். இயலாதவர்கள் அஷ்டமி நாளில் மட்டுமாவது விரதம் இருந்து வழிபாடு செய்யலாம்.

 

விஜயதசமி தினத்தில் அம்பிகை அசுரர்களை அழித்து வெற்றிவாகை சூடினாள். ஆணவம் சக்தியாலும் வறுமை செல்வத்தினாலும் அறியாமை ஞானத்தினாலும் வெற்றிகொள்ளப்பட்ட தினம் என்பதால் வீரம், செல்வம், கல்விக்கு உரிய தேவியர்களான துர்க்கை, லட்சுமி, சரஸ்வதி என முப்பெரும் தேவியர்க்கும் உரியதாக இதைச் சிறப்பாகக் கொண்டாடுகின்றனர். அன்றைய தினம் புதிதாகத் தொடங்கும் எல்லாக் காரியங்களும் எளிதாக வசமாகும் என்பது நம்பிக்கை.

‘நவம்’ என்னும் சொல்லுக்கு ஒன்பது என்று பொருள். புரட்டாசி மாதம் அமாவாசைக்கு அடுத்த நாள்முதல் தொடங்கி ஒன்பது நாட்கள் வரையில் நவராத்திரியாக அனைவரும் கொண்டாடுகிறார்கள். பத்தாவது நாள் விஜயதசமி நாளையும் இணைத்து மொத்தம் பத்து நாட்கள் நவராத்திரி விழா முடியும். பத்து நாட்கள் வீட்டில் கொண்டாடப்படும் ஒரே விழாவாக நவராத்திரி இருப்பதால், வீட்டை அழகுபட அலங்கரிக்க வேண்டும். பலவிதமான பொம்மைகளால் கொலு அமைத்து, விரதம் இருந்து, வீட்டிற்கு வரும் சுமங்கலிப் பெண்கறுக்கும் கன்னிப் பெண்களுக்கும் தகுந்த உபசரிப்புச் செய்து, அவர்களை மகிழ்விப்பார்கள். சிங்கப்பூரிலும் அனைத்து இந்துக் கோவில்களிலும் நவராத்திரி விழா கொண்டாடப்படுகிறது. ஒன்பது நாளும் கோவில்களில் கடவுளர்களுக்கு ஒன்பது விதமாக அலங்காரங்கள் செய்வார்கள். பொம்மைகளைக்கொண்டு கொலு வைக்கிறார்கள். வாய்ப்பாட்டு, பரதநாட்டியம், இசைக்கச்சேரி போன்ற விதவிதமான கலைநிகழ்ச்சிகளை மாலை நேரங்களில் நடத்துகிறார்கள். பத்தாம் நாள் விஜயதசமி விழாவினைக் கொண்டாடி நவராத்திரி விழாவினை நிறைவு செய்வார்கள். அன்று புதுப் பாட வகுப்பைத் துவங்குவது வழக்கம்.

 

இக்கட்டுரையின்வழித் தமிழ் முன்னோர்கள் வாழ்வில் விழாக்களுக்கு எவ்வளவு முக்கியத்துவம் கொடுத்துள்ளனர் என்பதை அறிந்துகொள்ளலாம். சங்ககாலத்தில் விழாக்களுக்குக் குறைவில்லை. சமய விழாக்களே பெரும்பான்மையாக இருந்திருக்கின்றன. இவ்விழாக்களின்போது பாட்டும் கூத்தும் விருந்துகளும் நிறைந்து மக்கள் மகிழ்ச்சியில் திளைத்துள்ளனர். இயற்கையில் ஆரம்பமாகிய வழிபாடு தொல்காப்பியர் காலத்திற்கு முன்பே தொடங்கி இன்றளவும் தொடர்ந்து இருந்து வருகிறது.

 

ஒவ்வொரு மாதத்திலும் விழாக்களை அமைத்துக் கொண்டாடியதால் மக்களிடையே ஒற்றுமையும் மகிழ்ச்சியும் மேம்படும் என்பதோடு, நாம் பண்டிகைகள், விழாக்கள் வழியாகத் துன்பங்களை எதிர்கொள்ளும் ஆற்றலையும் வாழ்வியல் நம்பிக்கையையும் வளர்த்துக்கொள்ள முடியும் என்றும் தமிழ் முன்னோர்கள் கருதினார்கள்.

​

துணைநூல்கள்

​

[1]   சேதுராமன், சி. (2009) பழந்தமிழர் விழாக்கள். வாழ்வியற் களஞ்சியம், தொகுதி 5, தமிழ்ப் பல்கலைக்கழக வெளியீடு.

​

[2]   சக்திவேல், சு. (1983) நாட்டுப்புற இயல் ஆய்வு.  மணிவாசகர் நூலகம், சிதம்பரம்.

​

[3]   ஞான அலாய்ச்சியஸ் (தொகுப்பாசிரியர்) அயோத்திதாசர் சிந்தனைகள். நாட்டார் வழக்காற்றியல் ஆய்வு மையம். தூய சவேரியர் கல்லூரி, 

        பாளையங்கோட்டை.

 

குறிப்பு: தீமிதித் திருவிழாவைப் பற்றிய தகவல்கள் மாரியம்மன் கோவிலைப் பற்றிய ஆங்கிலத் தொகுப்பிலிருந்து மொழியாக்கம் செய்யப்பட்டது.